Төтенше жағдайлар министрлігі өрт қауіпсіздігі ережесіне өзгеріс енгізді.
Төтенше жағдайлар министрінің ережеге 2024 жылдың 31 тамызында күшіне енетін норма қосылғаны туралы бұйрығында былай деп жазылған: «Электромобиль не оның қуаттау станциясын бокс, паркинг, көлік қоюға арналған орынжай, өндірістік гараж, шатырша астына және көлік сақтайтын ашық алаңға қойғанда сәулет, қала құрылысы және құрылыс саласындағы мемлекеттік нормативтерде белгіленген талаптарды сақтау керек».
Қуаттау станциясын орнату үшін қажет нормаларды Өнеркәсіп және құрылыс министрлігінің Құрылыс және тұрғын үй-коммуналдық шаруашылық істері комитеті биыл сәуірде қабылдап қойған.
Демек, 31 тамыздан бастап көлік тұрағына заң талаптарын сақтай отырып, арнайы құрылғы орнатып, электромобиль қуаттауға рұқсат беріледі.